#BatayDekolonizasyonMantal la dwe fè tout kote.
Mwen : Gen yon pwoblèm mesye ?
Kesye : wi, ou pa ranpli fich la byen.
Mwen : kòm li pa gen rati, Ou ka idantifye erè a pou mwen tanpri ? (Mwen mande l' ak anpil modesti)
Kesye : Ou ranpli fich la an kreyòl.
Mwen : wi, mwen pa konn ekri fransè. Gen yon pwoblèm nan sa ?
Kesye : mesye mwen pa gen tan pou dilatwa (epi li bleng li sone pou yon lòt kliyan avanse)
Mwen ouvè 2 pye m' devan kès la pou lòt moun pa gen aksè travèse m'.
Mwen : Ou pa li atik senk (5) konstitisyon an, manman lwa peyi ki di: tout Ayisyen alawonbadè pale yon sèl lang ki se kreyòl? Osinon bank sa pa fèt pou ayisyen, èske se pou ti group minorite ki konprann lang molyè a (Fransè) sèlman li fèt? Di m' byen ou fè pati kategori moun k'ap diskriminen lang peyi a ak valè kiltirèl yo!
Mwen menm mwen chwazi pa koube m' anba okenn règleman ki enpoze m' pale ak ekri lang kolonyal la, mwen pa gen pwoblèm ak yon lang men nan kontèks yo enpoze l' la pou devalorize yon lòt. Monchè avan w' di m' ranpli fich la nan lang mèt ou (an fransè), men livrè m' lan montre m' ki kote nan règleman bank lan ki di kliyan dwe ranpli fich la an fransè egzijibleman?
Kès la bloke tout moun ap asiste, msye fè tranzaksyon an ban mwen san li pa rache m' yon mo ankò, mwen tann li fini mwen vire do m'.
#BatayDekolonizasyonMantal la dwe fè tout kote.
Credit: nouvo lib