Repiblik Dominikèn: Yon ajan Polis antre anba yon machin mouri tèt nwè pandan l tap kouri dèyè yon ayisyen pou arete l

PÈP AYISYEN REKLAME YON LÒT FWA ANKÒ POU PREZIDAN JOVENEL MOÏSE KENBE PREMYE MINIS JEAN MICHEL LAPIN ,MISYE BON TOUT BON!
"Pa genyen okenn rezon pou'n repati a zewo ankò e si'l pa kraze, pa esye fikse'l."
==================
Nan yon seri de ti sondaj nou te fè nan diferan komin ki fòme 10 depatman peyi d Ayiti e kelke peyi etranje nan dyaspora ayisyen nan, vin ajoute sou sa zòt yo fè sou rezo sosyo yo isit ak lòt bò, nou te ranmase anpil opinyon ki mande prezidan (Jovenel Moïse) Jovnèl Moyiz pou'l kenbe la ak Premye Minis (Jean Michel Lapin) Jan Michèl Lapen ki pi kalifye pou kontinye travay la avèk plis pèfòmans pou sa genyen amelyorasyon e pwogrè nan travay pou kore pèp la jan sa dwa. Dayè, pou kounye a, nou pa kwè gen okenn sitwayen nan kan opozisyon an ki kab founi kalite travay PM Lapen ap fè la a si gen zak brigandaj ak kraze-brize jan tout moun te konstate sa nan peyi a nan dènye mwa lane pase a, sètadi 2019.
Sak bon lakay Lapen ankò,li pa yon aktè kap monte fim, ni li pa nan pale anpil ak pèsonn, sa la'p fè a,se sa la'p okipe , epi'l pote rannman nan moman pi difisil yo.
Fòk Prezidan an konprann trè byen ke mesye-dam opozisyon an pa vrèman nan kolaborasyon avèk li piske se yon gouvènman tranzisyon yo vle monte pou penmèt peyi a rete nan menm pozisyon an san okenn pwogrè e pou yo fè fòtin yo piske «Chat chode nan dlo cho, lè l wè dlo frèt, fòk li pè li.».
Nan yon sèl e senp kesyon nou te poze tout moun nou te gen chans pou n konvèse an gwoup e an patikilye, kesyon an pa lòt bagay: «Èske Prezidan Jovnèl Moyiz dwe kenbe ou ranplase Premye Minis Lapen nan moman sa a?»
Yo pat janm ezite pou reponn ke Prezidan an gen tout mwayen ak posibilite pou l kenbe e rekondui san aryè panse PM Lapen pou tout rezon sa yo:

1- Prezidan Jovnèl Moyiz konnen byen sa ki nan men li e l pa konnen ki move ganeman li pral vin travay ak li pou gate tout bagay.
Li pase maladi, fòk li konn remèd.
Pa bliye, se akòz de malveyan's mesye-dam opozisyon yo,ke peyi sa prèske gen 12 mwa san yon gouvènman ; kiyès nou panse ki pèdi
?

2- Li pa bezwen yon Pilat ayisyen nan sen li kap vin trayi l tankou Premye Minis ( Jean-Henry Céant) Seyan ki te soti pou te ba l yon kou pa konprann sètadi mete l atè plat. Se pa travay li te vin kolabore avèk prezidan an. Men li te vin regle zafè opozisyon an pou l te byen chita ak boujwa patron'l. Bondye fè konplo a pat gentan pase.

3- Prezidan an pa bezwen pran okenn opozan ki reyelman pa genyen menm volonte politik ak li. Dayè, yo pwouve l aklè nan refize reponn a apèl prezidan an pou yon dyalòg serye kap penmèt yale nan yon bon direksyon. Yo prefere aji tankou yon rayisab, yon bann jalou, ipokrit e trèt tou ki konpoze pou gate tout bagay.

4- Mesye yo, nan tout lojik pa gen bon konsèy yap bay pou apeze bagay yo. Se jalouzi ki nouri nanm yo. Mesye yo pwouve klè,ke se mal yo ta renmen wè pou prezidan an piske yo tout dèyè pouvwa a ke yo pwouve l pandan tout peryòd prezidan an sou pouvwa a.Tout sa moun san konprann yo kòm malveyan gen lide fè, se fè sa ki mal pou simaye panik. Nèg yo rive nan yon moman kote yo te menm anpeche ti mounale lekòl.

5- Premye Minis Lapen serye nan tout sa lap fè kòm yon sitwayen otantik e konpetan ki renmen peyi l e ki nan pèfòmans li pase anpil tan ap sèvi peyi a. Li pote yon chanjman ekstraòdinè nan chwazi yon direktè jeneral Lapolis konpetan ki se misye (Normil Rameau) Nòmil Ramo kap founi bon kalite pou bay pèp la bon jan sekirite. Pa fè kòmsi'n pa wè ke DG Nòmil Ramo fè nan 3 mwa, sa zòt pat ka fè nan 3 zan!
Tout moun konstate jefò ak pwogrè ki blayi nan peyi a nan domèn sekirite ki penmèt pèp la pran lari e frè n ak sè n yo kap viv deyò peyi a antre pou pase fèt fen lane a ak nouvèlan nan lanmou ak kè kontan. Bravo PM Lapen, chapo ba pou DG Ramo!
Ekselans Jovnèl Moyiz, pa genyen okenn rezon pou n repati a zewo ankò e si l pa kraze, pa esye fikse l.
Sa se yon plis e yon mwayen pou pwouve si Premye Minis Lapen te apwouve legalman, anpil bèl bagay tap gentan fèt nan peyi a pou amelyore kondisyon lavi pèp la menm avèk fèb mwayen li ta genyen. Li pwouve konpetans li.

6- Prezidan an nan ti results ki rete li pa genyen okenn rezon pou l ranplase pèsonn pou l rekòmanse. Se pa chanje moun kap pote solisyon nan pwoblèm sa ki date depi lontan. Se ankadreman avèk ekspè nan ekonomi pou akonpaye Minis Finans lan pou bon pèfòmans.

7- Se pou Prezidan an travay avèk moun pa l ki vle bon jan rannman nan tout domèn pou byen peyi a. Kouri chanje Premye Minis Lapen pou yon lòt se «kouri pou lapli, tonbe nan gran rivyè.»Li preferab pou prezidan aji konsa: «Pye bèf pou pye bèf, map prann kay pratik.» Dayè,Lapen fè prèv li deja,misye bon tout bon!

8- Se Prezidan an ki toujou di: «Vwa pèp la,se vwa Bondye .» Alò, li dwe respekte vwa pèp la ki mande'l kenbe PM Lapen san konpasyon.
Pinga moun vin betize ak nou jodi a. Yo fè pèp la pèdi 3 zan nan vòt li a,nan bloke tout pwojè prezidan an te genyen, jodia nou pa'p padone yo e listwa nonplis.

9-Nou pa bezwen bann tapajè sa yo ki vin pare pou eseye fè yon lòt kou. Se pou prezidan an pran anpil prekosyon pou l pa tonbe nan menm mera a ankò. Se pou l pa pran nan presyon ak entimidasyon pyès nan ekip blofè sa yo ki kontribye lajman-laj nan mete peyi a nan eta sila li ye jounen jodia.
Komisyon pa chaj e n fe l jan yo te mande nou paske pèp la fè prezidan an konfyans tout kote l pase pou fason li aji pou l ede.
Ekselans,Ou dwe koute vwa pèp la pou sa kontinye e fini an bote.Kontinye ak premye Minis Lapen!