Rezo Agwoekolojis Ayisyen yon nouvo estrikti ki angaje nan souverènte alimantè.
Plizyè ansyen etidyan Lekòl Fòmasyon Politik Chalmay Peral ki soti nan tout 10 depatman yo te resevwa fòmasyon debaz sou agwoekoloji ak metòd konsèvasyon sòl nan dat ki 3 pou rive 10 avril 2022 e tou mete kanpe yon rezo Agwoekolojis
Ansyen Etidyan LFPCP ki regwoupe manb òganizasyon tankou Mouvman Peyizan Papay MPP, Kòwòdinasyon Regwoupman Òganizasyon Sidès KRÒS, Mouvman Nasyonal Kongrè Peyizan Papay MPNKP, Solidarite Fanm Ayisyèn SOFA, Tèt Kole Ti Peyizan Ayisyen TK, Platfòm Fanm Òganize pou Devlopman Atibonit PLAFODA, PAPDA ak anpil lòt ankò te benefisye yon lòt fòmasyon kòm zouti nan batay la. Se yon ansanm òganizasyon ki ap batay pou kraze fòm leta ak sosyete kapitalis sa pou ayiti granmoun tèt li e bay menm chans ak tout pitit li yo.
Etidyan sa yo te fè estaj pratik nan zòn Lokafe yon lokalite ki se travès rivyè Samana e la yo ta pral plante banbou pou anpeche rivyè a kraze jaden peyizan yo lè l ap desann. Daprè peyizan ki travay nan zòn lan lè rivyè a desann anpil gwo dega fèt nan jaden yo.
Konsyan aprè tan fòmasyon sa benefisyè yo tou mete kanpe yon rezo ki pral travay pou fè jaden san angrè ak pestisid chimik nan respè pou anviwonnman an ak sa ki ladan l. <<Mwen fè pati rezo Agwoekolojis nan amerik latin lan men mwen swete nou fòme yon rezo Agwoekolojis ayisyen tout bon pou nou patisipe nan sove planèt la. >> Deklarasyon Direktè LFPCP Chavannes JEAN-BAPTISTE.
<< Chak metòd konsèvasyon sòl genyen tip sòl pou aplike li e depi tè a genyen yon ti pant ou dwe aplike metòd konsèvasyon sòl pou evite bon tè a ale. E se nan tout ayiti a nèt nou dwe aplike metòd yo pou konbat ewozyon. >> deklarasyon Wilter SAINT-FLEUR youn nan teknisyen ki tap fè pratik yo sou teren.
Rezo Agwoekolojis sa bay tèt li misyon pou vann yon modèl agrikilti ki chita sou souverènte alimantè, manje ki pap bay maladi e konsève plizyè varyete plant ak ras zannimo. Jodi a gwo konpayi agribiznis yo aplike metòd pou fè manje rapid men ki detwi lavi nan tè a rapid e menase sante tout anviwonnman an ak konsomatè yo.
Agrikilti endistriyèl la fin modi latè ak pestisid e angrè chimik ki detwi lanati poutan nan 90 jou yon konpòs natirèl ka pwodwi pou bay lavi pou lontan. Militan sa yo makonnen batay ideyolojik la ak batay pratik la pou pèmèt tout moun jwenn manje ki sen an kantite ki fèt nan jaden peyizan ayisyen.
DASSO VARIETY DON
dassovarietydon@gmail.com